SHILLONG: New Shillong Township-o da·o dingtang dingtang project-rangko a·bachengatengahaon, Shillong songjinmani mongsonggipa biaprango ramarang apchangket ong·a gitan ia biaprangoba manderang neng·nikanirangko chagrongna nangjana gita ia New Shillong Township-ni ramarangko apalbatatchina gita jolo songdongenggipa manderang nangniktokenga.
Ia New Shillong Township-o da·o NEIGRIHMS, SICPAC, MATI office, IIM Shillong, Shillong Technology Park aro NIFT-rangko chalaiengahani gimin bang·a manderang da·o ia biapo re·rurana a·bachengengahaoba ramarang, Shillong songjinmani mongsonggipa biaprango gitan apsan ong·aiani gimin mikkangchi apsan dakgipa neng·nikanirangkon chagrongna nangaigen ine niksamsona gita man·engachim.
Da·alo Shillong songjinmao ramarang apchangket ong·dugaengahani a·selan manderang neng·nikanirangko chagrongna nangtokengahaoba, ia ramarangko apalbatatna gita biaprang dongjahani gimin neng·nikanirangko namatani cholrangba dongskajaha aro uandaken New Shillong Township-oba ia apsan dakgipa neng·nikaniko chel·chaksona gita da·onin ramarangko apalbatatna nangskaengahachim.
Ia sal somoirango Nongmensong-oni NEIGRIHMS-ona dakanggipa ramao jakchakgija ong·aniko nikna man·engaha aro da·o ia jolrango bang·a nokrangkon rikengahani gimin ramao apchangketanirangba batrorobaengahachim.
New Shillong Township-ni ning·o donggipa ramarangko taritokahaoba ia a·arangoni bang·batan sorkarini a·arangsa ong·ani imin mikkangchi ia jolrango neng·nikanirangko chagrongna nangjana gita chonchongipa ramarangko tariani pal, ramarangko apalbatate aro four lane dake tarina nangengaha ineba jolo songdongenggipa manderang parakataha.
Ia New Shillong Township-o ramarang aro street light-rangba nambata indiba ia biapon Meghalaya Legislative Assembly Building, Shillong Medical College & Hospital aro uandakgipa nokrangkoba rikna siengani gimin ramarangko apalbatatna nangchongmotgen ineba jolo songdongenggipa manderang aganaha.