SHILLONG: Me·chikrangba pilak kamrangon chu·sokgipa ong·na man·enga aro me·chikrangna Parliament-o biaprangko kangna nangengaha ine Mongolbar salo, Social Justice & Empowerment-ni Union Minister of State (MoS) Dr Ramdas Athawale parakataha.
Mongolbar salo, University of Science & Technology Meghalaya (USTM)-o ua university-ni chatro chatrirangna aro skigiparangna aganprakengmiting somoio ia kattarangko aganaha.
USTM-o tarie dongipa Baba Saheb Ambedkar-ni bimangoba ua pul bibalrangko done mande ra·pilskaaniko dakangaha.
USTM-o Dr Athawale, university-ni chatro chatrirangna aro skigiparangna aganprakangengon, “Pilak biaprangon me·chikrang chu·sokgipa ong·engaha aro uamang, Lok Sabha aro Rajya Sabha-o biaprangko man·na nangengaha. Me·chikrang a·gilsakni seng·aniko man·ode songsal gimikan a·gilsakni seng·aniko man·gen aro uandaken a·song gimikan a·gilsakni seng·aniko man·gnok,” ine Union Minister of State aganaha.
Scheduled Caste scholarship-rangnaba chatro chatrirangni bimingko on·atchina gita Dr Athawale, USTM-ko didiangaha aro ia university-na ma·mong sorkari dakchakanirangko on·gen ine ku·rachakaniko on·angaha.
USTM-ni nitobegipa campus-na mittelpilangengon, ua USTM-ko namroro silroroatna gita pilak nanga dakchakanirangko on·gen ine Dr Athawale ku·rachakaniko on·angaha.
