SHILLONG: 2023-24 bilsina budget-ko tarianio SSA-na tangka paisa chamaniko bariatchina gita Budbar salo, Meghalaya SSA Schools Association (MSSASA), a·dok sorkariko didiangaha.
Budbar salo, a·dokni Deputy Chief Minister Prestone Tynsong aro Education Minister Rakkam A Sangma-ko grongeani ja·man kobor ra·timgipa manderang baksa agangrikengon, batanggimin bilsirangoba SSA-na tangka paisarangko komie chamahani a·sel skigiparangna dormaharangko on·anio neng·nikanirangko chagrongna nangahani gimin ia bilsiode SSA-na bang·bata tangka paisarangko chamchina sorkariko didiaha ine MSSASA-ni president Aristotle C Rymbai parakataha.
Rymbai-ni parakatani gitade, a·doko SSA-na tangka paisarangko bang·bate chamgenchimode ma·mongoni tangka paisarangko watatanio ja·manchakgenchimode sorkari, SSA skigiparangna somoi gitan dormaharangko on·na man·genchim.
Indake ong·engon, SSA skigiparangni dormaharangko a·dok sorkari somoi gita gamna SSA-na tangka paisarangko bang·bata chamna man·genma man·jawa uko nina gita a·dokni Deputy Chief Minister ku·rachakaniko on·ataha ineba Rymbai parakataha.
SSA-ni lower aro upper primary skulrango bang·en bangbang ong·e dongenggipa skigiparangni kamrangko gapatna nangengani giminba uamang sorkari baksa agangrikaha ineba MSSASA-ni president parakataha.
SSA skigiparangni dormaharangko somoi gita on·china dabienganiko chu·sokatna sorkari jotton ka·gen ine a·dokni Education Minister Rakkam A Sangma-ba parakataha.
“SSA skigiparangni dormahako chinga December jaonade on·na man·aha aro bangki dormaharangkoba on·na gita chinga ma·mong sorkarini watatenggipa tangka paisarangna sengengkua. Sal 15-ni gisepon chinga tangkarangko man·sona ka·dongenga,” ine Sangma aganaha.
CUET-oniko watchina dabienggipani bidingo janapatskaengon, da·o dipet uamang Ministry-ni aganchakanina sengengkua ine a·dokni Education Minister parakataha.
