SHILLONG: Batanggimin bilsi bongani gisepo, sak 900-na baten Khasi aro Jaintia Hills-ni damsni a·jarango manderang cancer saaniko man·e siangaha ine kobor on·aha.
Iani bidingo kobor ra·timgiparangna parakatengon, Meghalaya a·doko me·asarangan me·chikrangna bate cancer saaniko man·enga ine Shillong Civil Hospital-ni ning·o donggipa Population Based Cancer Registry (PBCR)-ni Principal Investigator Dr WB Langstieh Budbar salo parakataha.
Dr Langstieh-ni parakatani gitade, 2017 bilsioni 2021 bilsiona Khasi-Jaintia Hills-ni damsni a·jarang, chong·motan East Khasi Hills, West Khasi Hills, Jaintia Hills, Ri Bhoi aro Eastern West Khasi Hills a·jarango sak 3133 me·asarang aro sak 1776 me·chikrangko man·chape gimik sak 4909 manderang, cancer saaniko man·e siaha.
PBCR Shillong-o see rakkianiko parakani gitade, batanggimin bilsi bongani gisepon sak 4972 me·asarang aro sak 3184 me·chikrangko man·chape gimik sak 8156 manderang, ia damsni a·jarango cancer saaniko man·taiaha.
Tobacco Related Cancer (TBC) ba ta·makku jakkale cancer saaniko man·giparang East Khasi Hills a·jaon bang·batenga aro iarangoni bang·bata me·asarang ong·a ineba Dr Langstieh parakataha.
Ta·makku jakkale cancer saaniko man·giparang India a·songon bang·batengani gimin mikrakchina gita Shillong Civil Hospital-ni senior oncologist Dr Anisha Mawlong didiatskaaha.
Indake ong·engon, Shillong civil hospital-ni cancer wing-o ge 90 palangrang baksana salo simsak nirokani cholrangba dongahani gimin da·o cancer sagiparangko ia cancer wing-o sanna gita tariaha ineba Dr Mawlong parakataha.
Indake ong·engon, Meghalaya a·doko cancer saaniko man·giparang batrorobaengani gimin bilake kamrangko ka·na nangenga ine nikenba a·dok sorkari, cancer mission-ko a·bachengataha ine iana skang, Meghalaya a·dokni gital Health Minister Ampareen Lyngdoh parakataha.
Budbar salo, health official-rang baksa tom·e chanchirimani ja·man kobor ra·timgipa manderang baksa agangrikengon, a·doko cancer sabisian manderangko so·otbatenggipa sabisi ong·enga ine ma·sina man·aha ine Minister parakataha.
Ja·mano ua, Shillong civil hospital-ni cancer wing-koba re·ange nieaha aro cancer sagipa manderangkoba grongbaaha.
