WILLIAMNAGAR: Azadi Ka Amrit Mahotsav-ni bak gita Budbar salo, Williamnagar-ni Nehru Yuva Kendra Sangathan (NYKS), salsani Yuva Utsav-ko Williamnagar-ni DRDA Hall-o ong·atangaha aro ia program-ko ong·atanio dingtang dingtang skul aro college-rango poraienggipa chatro chatrirang bakko ra·angtokaha.
Ia Yuva Utsav-ko ong·atanio East Garo Hills a·jani Deputy Commissioner Jagdish Chelani, mongsonggipa sokgipa ong·e chadamberangna aganprakangengon, India a·songo manderangni jelbra jelsuani gimin aganangenba, mande jelbra jelsuani a·sel chadamberang kamrangko man·anio neng·nikanirangko chagrongna nangenga ine parakangaha.
An·tangtangni janggi tanganio chu·sokgiparang ong·na man·na gita rake kamko ka·china didiangengon, district administration-ni gita chatro chatrirangna pilak nanga dakchakanirangko on·gen ine Chelani, ku·rachakaniko on·angaha.
Ia program-ko ong·atanio Rural Self Employment Training Institute (RSETI)-ni Director CG Momin-ba dongpae, chadamberangna aganprakangengon, mikkangchi nambata janggi tanganiko man·na gita sorkarini on·enggipa dingtang dingtang scheme-rangko ra·china didiangaha.
Ia Yuva Utsav-ko ong·atanio dongpae, chatro chatrirangna agan-ku·pattie on·anggipa gipin manderangara, Williamnagar-ni Lead Bank Manager Moidul Islam, NYKS-ni Deputy Director Linda BK Sangma aro gipinrang ong·a.
Ia program-ko ong·atani bak gita dingtang dingtang susaanirangkoba chatro chatrirangna ong·atangaha.
