TURA: South Garo Hills a·jani Chokpot jolo donggipa Dareng chiringoniko niam gri ro·ong bikotenga ine matnangenba adita salrangna skang, ia jolo donggipa dolgni NGO baksana songni manderang jinma tom·bimonge jegalanirangko dakangani ja·man, ia quarry-ni nokgipa, an·tangni kosako matnanganirangko jegalatskaaha aro ua Nokma-ni NOC aro sorkarini mining lease-ko man·ani ja·mansa ro·ongrangko bikotenga ine talataniko on·angaha.
An·tangni kosako matnanganirangko jegalatengon, “Ia biaponiko ro·ong bikotna gita anga Meghalaya Minor Mineral Concession Rules 2016-ni ning·o mining lease-ko ra·chengaha aro angna ia mining lease-ko 2021 bilsini February jao on·aha,” ine quarry nokgipa Alpha D Marak parakataha.
Nokmani aro songni manderangoniko NOC ra·chengja ine matnanganirangna aganchakaniko on·angskaengon, ia biapara Cheran Maharini a·king ong·e maharini permission-ko ra·chengani ja·mano Budugre songni Nokma an·tangan una NOC-ko on·ahani gimin uni kosako iandake matnanganiranga tol·e matnanganisan ong·aia ine Marak parakataha.
Ia ro·ong quarry-ko jegalengani gimin songni manderangko aro dolgni NGO-rangko sing·doatengon, ia quarry-ona ramako 2020 bilsini November jaon tarina a·bachengahachim indiba ua somoirango darangba jegaltokgija re·anggipa March-ni 14 tarikosa badiaba dolrang jinma tom·aniko ong·ate ia quarry-ni kosako jegalchengaha ine quarry nokgipa parakataha.
“Nokma baksana saksa sakgni manderang ia biaponiko ro·ong bikotaniko jegaltokengani gimin Cheran Maharini membor-rang baksana songni bang·a manderangan, ia dolrangni jinma tom·aniko ong·atna skang March-ni 10 tarikon angna chakpaaniko on·e Chokpot-ni SDO-ko grongenba chittiko on·eaha,” ine Marak parakataha.
Dareng chiringoniko niam gri ro·ong bikotenga ine matnangenba, re·anggipa March-ni 14 tariko Budugre Village Environment Protection Committee aro Chokpot Area Vigilance Committee-ni dilanichi, songni manderang jinma tom·e jegalanirangko dakangahachim ine nikna man·a.