SHILLONG: Meghalaya a·doko champengatako man·gipa Hynniewtrep National Liberation Council (HNLC) bobil dol baksa tom·tomanina agangrikani matchotangengaha ine Sukrobar salo a·dok sorkari parakataha.
“Champengatako man·gimin HNLC bobil dol aro sorkarini gisepo agangrikani da·o bon·kamgipa bakona sokengaha aro bakan matchotgnok,” ine Sukrobar salo, Cabinet tom·a matchotani ja·man, sorkarini ku·wattimgipa aro a·dokni Tourism Minister Paul Lyngdoh parakataha.
Iani bidingo a·dokni Governor, Assembly-ni Budget Session-ko a·bachengatani somoio jinmana parakatgen ineba ua aganaha.
HNLC bobil dol baksa agangrikaniko a·bachengatna gita re·anggipa bilsion Meghalaya sorkari, kamoni neng·takgimin IAS officer Peter S Dkhar-ko ku·baltitimgipana seokahachim aro uko ia kamo gitcham IPS officer AK Mishra dakchakengachim.
Ja·mano HNLC bobil dolni gitaba, sorkari baksa agangrikna Hynniewtrep National Youth Front (HNYF)-ni president Sadon K Blah-ko an·tangtangni pal ku·baltitimgipana seokskaahachim.
Sorkari baksa agangrikaniko a·bachengna gita re·anggipa bilsini August 25 tarikon, HNLC bobil dolni sakbonga dilgiparang a·dokona sokbaaha.
Get real time updates directly on your device, subscribe now.
Comments are closed.