SHILLONG: UDP, HSPDP aro PDF dolrangni MDA-II sorkario bakrimaniara a·joltangni manderangko cha·bokani gita ong·aha ine Sonibar salo, Voice of the People’s Party (VPP)-ni president Ardent Miller Basaiawmoit janapatenba, re·baenggipa 2028 bilsio doltangari sorkariko rikskana gita uamang nisanko donaha ine parakataha.
Ia 2023 bilsini Assembly election-o chu·sokgipa ong·ahani gimin manderangko mittelpilna gita VPP-ni tom·bimonganiko Polo Ground-o ong·atanio Basaiawmoit, ia kattarangko parakataha.
“Chinga (VPP) manderangna ka·donganiko on·na man·aha. A·joltangni gipin political dolrang a·doko songdongenggipa manderangni nangnikanirangko chu·sokatna man·jahani gimin manderang da·o uamangna ku·rang on·gipa dolo ka·dongengaha,” ine VPP-ni president aganaha.
Basaiawmoit-ni aganani gitade, ia chang a·joltangni political dolrang an·tangtangan sorkariko dilna cholko man·ahachim.
“A·joltangni gipin political dolrang chingko wate katahani a·sel chinga sorkariko rikna man·jaha aro opposition-o ong·skana nangaha,” ine ua aganaha.
Ia political dolrang, an·tangtangni man·gnirangna rikgipa dolrangsan ong·aia ine matnangatengon, ong·gijagipa ja·kurangko de·anichide uamang 2028 bilsio sorkariko rikna man·jawa ine VPP-ni president parakataha.
“Manderang chingo ka·donganiko mesokahani gimin chinga manderangni bebera·aniko watgaljawa aro iako anga ku·rachakenga,” ine Basaiawmoit aganaha.
Basaiawmoit-ni parakatani gitade, ia 2023 bilsini Assembly election-o VPP, seat dambriko cheahani gimin bang·bata political dolrangan aiao inmantokaha.
Ia bilsio VPP susajagenchimode NPP doltangarian, bilsi bongana sorkariko rikna man·gnokchim ineba ua aganaha.
Re·baenggipa 2024 bilsio KHADC aro JHADC election-rangko ong·atna siengani gimin bang·a manderangan VPP-ni tikitko bi·na re·batokengaha ineba ua aganaha.
“Badiaba badiaba constituency-rangode sak 20-na baten manderang, VPP-ni tikitko am·enggiparang donga. Ia pilakan ia jolrango VPP-ni balwa bilakengani gimin ong·a,” ine VPP-ni president parakataha.
