SHILLONG: Rang·gitik a·sel ong·ani aro ong·telaigipa a·sel ong·ani somoirango nambate ja·kurangko de·na man·na gita Disaster Management-ni skanggipa tom·aniko bakan ong·atgen ine Robibar salo, a·dokni Revenue & Disaster Management Minister Kyrmen Shylla parakataha.
“Rang·gitik a·sel ong·ani aro ong·telaigipa a·selrang, jekai banggriani, chi banani, a·a rurongani aro uandakgipa a·sel ong·ani somoirango chinga nambate ja·kurangko de·na man·na gita bakan tom·e chanchirimanggen,” ine gnigipa changna Revenue & Disaster Management Minister ong·enggipa Kyrmen Shylla parakataha.
A·sel ong·ani somoirango kamrangko ka·na gita nangenggipa korosrangni giminba ia tom·anio chanchirimgen ineba Shylla parakataha.
March 19 tarikoni 21 tarikrangona Meghalaya a·dokko man·chape salgro salaram a·dokrango mikkarang jime waangnaba gnang ine Indian Meteorological Department (IMD)-oni mikrakataniko on·angahani gimin a·dokni Disaster Management-ni gitaba tarisamsona tom·aniko ong·atani bidingo minister aganaha.
March 19 tarikoni a·bachenge salgittammangna, Bay of Bengal-oni balwarang, salgro salaram a·dokrangchipakna balbanaba gnang aro ia salrango mikkarang jime waangnaba gnang ine IMD-oni mikraksamsoataniko on·angahachim.
