College principal-rangni tom·bimonganiko ong·ata

TURA: Meghalaya College Principals’ Council (MCPC)-ni annual general meeting ba bilsini tom·bimonganiko Sonibar salo, Tura Don Bosco College-o ong·atangaha.
Ia tom·bimonganiona Shillong aro Meghalaya a·dokni dingtang dingtang biaprango donggipa college-rangni principal-rang sokbatokaha aro uamangko Tura Don Bosco College-ni chatro chatrirang aro kamko ka·enggiparang rimchaksotokaha.
Principal-rangko chatro chatrirang, git ring·e aro Wangala chroke rimchaksotokaha.
Ia tom·anio Shillong Bissau College-ni Principal aro MCPC-ni president Dr S Bawri, jinmana aganprakengon, dal·e jumang nikchina aro an·tangtangni jumangko chu·sokatna gita rakbee kam ka·china chatro chatrirangko didiangaha.
MCPC-ni tom·anio, dingtang dingtang college, university, education department aro UGC-ni man·enggipa neng·nikanirangko namatna gita chanchirimangtokaha.
Ia tom·aniko St Edmund’s College-ni Principal aro MCPC-ni general secretary Dr Sylvanus Lamare dilangskaaha.
MCPC-ni tom·bimonganio gital office bearer-rangkoba seokangjolaha aro ia tom·bimonganio gimik sak 22 principal-rang bakko ra·angaha.