Ganol hydel project-ni kamrangko dontongna AGHTEA ka·mikkenata

TURA: 2019 bilsionin Ganol hydel project-o kam ka·gipa manderang, an·tangtangni man·na nangkuenggipa dormaharangko man·tokkujaengani gimin re·baenggipa April jani gisepo kam ka·giparangna uamangni man·na nangkuenggipa chu·gimik dormaharangko on·jagenchimode Ganol hydel project-o kam ka·giparang kamrangko dontonggnok ine All Garo Hills Trained Electricians Association (AGHTEA) ka·mikkenataniko on·angaha.
Ganol Hydel project-o kam ka·giparangna 2019 bilsionin, uamangni man·na nangenggipa dormaharangko on·kujaengani gimin re·anggipa March-ni 16 aro 17 tarikrangoba AGHTEA-ni membor-rang salgnina asonge jingjengatanirangko dakangahachim aro uamangni salgnina asonge jingjengatanioba uamangna maming aganchakanirangko on·jahani gimin re·baenggipa April jani gisepo maming aganchakaniko on·jagenchimode Ganol hydel project-o kam ka·giparangko kamrangko dontongate jingjengatangskagnok ine AGHTEA-ni president Justin T Sangma parakataha.
“2019 bilsionin Ganol Hydel project-o kam ka·giparangni man·gnirangko on·kujaengani gimin chinga chubata gadango donggipa official-rangna dingtangmancha seachiba u·iatahachim indiba official-rangni maming aganchakanirangko man·kujaengani gimin jingjengataniko dakna draatako man·aha,” ine Sangma parakataha.
Sangma-ni parakatani gitade, 2019 bilsionin Ganol hydel project-o kam ka·giparangni man·gnirangko on·kujaengani gimin uamangni man·na nanganirang da·o lak 20-mang batpilengahachim.
“Uni gimin chingni man·gnirangko da·o March aro April jani gisepon chu·gimik matchote on·china chinga dabienga aro iani bidingo da·o antisani gisepon chingna maming aganchakanirang dongjagenchimode Ganol hydel project-o kam ka·enggiparang kamtangtangko dontongate jingjengatangskagnok,” ine AGHTEA-ni president mikrakataniko on·ataha.