M’laya Int’l Film Festival-ko matchotata

SHILLONG: Salbongana ong·atanggipa Meghalaya International Film Festival-ko re·anggipa Sonibar salo, Shillong songjinmani U Soso Tham Auditorium-o matchotataha aro ia film festival-ko matchotatani somoio 1981 bilsio tarigipa skanggipa ‘Khasi jawilwat Ka Synjuk Ri Ki Laiphew Syiem’-ko jinmana mesokangaha. Ia jawilwatko Hamlet Bareh Ngapkynta sagi tariahachim aro ia jawilwatko mesokani somoio uni depante Ribor aro uni nokdangni manderangba dongpae bak ra·angtokaha.
Ia film festival-ko matchotatani somoio Meghalaya Film Makers’ Association (MeFilMa)-ni president Commander Shangpliang, jinmana aganprakangengon, ia film festival-ko ong·atanio pilak nanga dakchakanirangko on·ahani gimin Meghalaya sorkariko mittelpilangaha.
Film industry-o manderangna bang·en janggi tangani cholrang donga indiba film industry-o kamko ka·na gita skie on·gipa institute-koba nangskaenga ineba Shangpliang aganaha.
Ia tom·anio Information & Public Relations Minister Ampareen Lyngdoh, mongsonggipa sokgipa ong·e jinmana aganprakangskaengon, ia film festival-ko nambee ong·atahani gimin MeFilMa-ni membor-rangko mittelpilangenba, jawilwatrango kal·na changgipa joltangni manderangna cholko on·a gita sorkari, film industry baksa bakrime kamrangko ka·rimna sikenga ine parakataha.
Ia film festival-ko matchotatani salo dongpae bak ra·anggipa gipin manderangara, Bhutan a·songni actress Sonam Uangden, Vietnam-ni film director Mai Thu Huyen, film director Barnali Ray Shukla, Sanjay Mishra aro gipinrang ong·a.