SHILLONG: Re·anggipa bilsio Mukroh songo Assam police-rangni skatang goanichi dosgri manderang siangna nangani gimin ia a·selni bidingo Central Bureau of Investigation (CBI)-chi inquiry-ko dakna Union Home Minister Amit Shah-ni ku·rachakgipani bidingo Mongolbar salo, Nongkrem-ni VPP MLA Ardent Miller Basaiawmoit, Assembly-o sing·doangaha.
Assembly budget session-ni gnigipa salo, Governor-ni aganprakanggipani bidingo chanchirimangengon, ia a·selni bidingo CBI-chi inquiry dakna ku·rachakani ja·man da·o maming kobor dongdapjaengaha ine Basaiawmoit parakataha.
“Mukroh songo Assam police-rangni niam gri re·napbae songni manderangko goani bidingo CBI inquiry-ko dakna ku·rachakahaoba da·onan maming ja·kurangko de·kujaenga. Iara ma·mong sorkarian Assam sorkariko gisik saatna sikjaengani giminma? Ma ia a·selni bidingo ma·mong sorkari Meghalaya a·doknan simsakteljaengasama?” ine VPP MLA sing·doangaha.
Mukroh songo a·sel ong·ani ja·man November-ni 24 tariko Chief Minister Conrad K Sangma an·tangan Delhi-ona re·ange, ia a·selni bidingo CBI inquiry-ko dabina gita Union Home Minister-ko grongeahachim ineba Nongkrem MLA gisik ra·atpilaniko dakangaha.
Governor-ni aganprakanio, Mukroh songo ong·gipa a·selni bidingo inquiry-ko dakna gita judicial commission-ko songaha ineba aganahachim ine janapatskaengon, ia commission Mukrok songo a·sel ong·e sianggipa manderangna kakket bichalko ra·baama ra·bachipjawama ine Basaiawmoit sing·doangaha.
Assam aro Meghalaya a·dokni simarango ong·enggipa golmalrangko namatna kam ka·enggipani gimin janapatskaengon, kamrangko sikkelesa ka·aigenchimode maming namgnirangko ra·bana man·jawa batesa noksan ong·aona sokaigen ine Basaiawmoit parakataha.
“Angni iako aganani ortode, skanggipa bako Assam aro Meghalaya sorkarirangni MoU-o soi ka·grikanio sima jolrango songdongenggipa manderangan chu·ongnikaniko man·jaha. Meghalaya a·dok ning·o ga·akgipa West Khasi Hills aro Ri Bhoi a·jani bang·a songrangan da·o Assam-onasa re·angaha aro iani a·selan ia jolrango songdongenggipa manderang MoU-ko den·galpilchina dabie jingjengatanirangko daktokaha,” ine Nongkrem-ni VPP MLA aganaha.
Simarango ong·enggipa golmalrangko namatna gitade nangchongmotenga ine janapatskaengon, ia kamko ka·engon, pilak dolrangkon aro songni nokni manderangkoba rimesa name kamko ka·na nangenga ine Basaiawmoit parakataha.
Mukroh songo a·sel ong·aniko CBI-chi inquiry dakna ku·chakgipani bidingo VPP MLA sing·doa
Date:
Share post:
