Shillong: VPP legislator Adelbert Nongrum-ni parakatgipa private member bill ‘The Meghalaya Selection of Candidates for Quota Seats to Higher Academic Course Bill 2023’-ko Butbar salo Assembly session-o jegaltokaha.
Bill-ko chanchirimna parakataon, ‘Legislator-rangko dal·dalgipa miksonganiko chu·sokatna seoka’ ine Nongrum aganaha.
“Ian angni parakatchenggipa Private Members Bill ong·ja, iana skang mija bilsio Agriculture Land Regulation-ko parakatahachim indiba House-o talate on·na skangan bon·chipaha, ine Nongrum aganaha.
Gnigipa private members bill, Gaming Act-ni bidingoba mija bilsini Autumn session-o parakatahachim, ua bill-na chakpaaniko man·jaha.
Uandake re·anggipa bilsioba House-o State Reservation Policy-ko nipiltaina Resolution-ko on·ahachim. Indiba Resolution-na chakpaaniko man·jaha.
Indiba Meghalaya-ni High Court, State Reservation Policy-ni bidingo roster system-ko ra·gatchina ge·etaniko on·aha, ine Nongrum aganaha.
Apsan daken ia Private Members Bill, a·dokni chadamberangna namgni ong·gen ine janape, Bill-na chakpachina mol·molangaha.
Nongrum-ni Bill-ko parakatna somoiko bi·on NPP-ni dilenggipa MDA sorkari, jegalaha.
