Opposition, MDA-ko sima arini bidingo soi ka·gipa MoU-ko nipiltaina agana

SHILLONG: Opposition Butbar salo, MDA sorkariko sima arini bidingo Assam baksa soi ka·gipa MoU-ko nipiltaichina aganaha, indake ong·engon Chief Minister Conrad Sangma, dam a·dokni gisepo agangrikaniko a·bachengtaina regional Committee-ko songtaina re·mikkangengjok.
Special motion-o Congress-ni MLA Charles Marngar, sorkariko gitcham regional committee-ni agan-ku·pattianiko nipilja ine aganaha. Khanapara aro Pilangkata sector-o ga·akgipa bang·a songrang ASTC camp aro Dreamland Resort-ko man·gope, iarang Assam-ni ning·o ga·akaha ine aganaha.
Batanggimin bilsi 2011-o sorkari, Khanapara aro Pilangkata sector-ni 2.29 km a·ako a·kangahachim indiba da·ode a·dok baksa 0.55 sq km-san dongrikaijok, bangki 1.74 sq km-ko MoU-ni a·sel gimatna nangaha.
Marngar-ni aganani gita, West Khasi Hills-ni Khasi Syiemship-ni ning·o ga·akgipa bang·a songrangba Assam-o napangaha. East Jaintia Hills district-ni 11.20 sq km-oniko Meghalaya, 6.42 sq km-kosan man·rikaha, a·dok Ratachera sector-onikoba 4.78 sq km-ko gimataha. Una agre Malidor river ba chiringni nokgipa ong·anikoba gimataha.
Sorkariko sixth schedule-ni para 20 niamko aro Assam re organisation Act 1969 aro North East re organisation Act 1971 -ni niamko pe·a ine  matnangaha. Assam baksa MoU-ko soi ka·na skang traditional institution baksa agangrika dongja ineba sorkariko matnangaha.
Indake ong·engon Nongpoh MLA Mayralborn Syiem, gnigipa bakna agangrikaniko a·bachengna skang name dake chanchirimna nanganiko parakaha.
Synjuk Ki Rangbah Shnong-ni Block 2 jolo ga·akgipa bang·a songrangni gimin chanchipilna nangenga. Synjuk Ki Rangbah Shnong, dam 22 songrangni gimin sorkarina lekka seataha. Indaka somoio an·ching politics-o gale name dake chanchina gisikko jakkalna nanggen ine aganangaha.
Uandake Nongrekm MLA, Ardent Basaiawmoit, MDA sorkarini sima arini mamlao kam ka·aniko gitcham sorkari baksa tosusagrikataha.  MoU-o Meghalaya, 18.19 sq km-ko Assam-na on·ataha aro a·dok baksa 18.6 sq km biapsan dongrika.
Chief  Minister Conrad Sangma, iani gimin aganchakatengon, ‘bilsi 2011-o sorkarini on·gipa document-o Assam sorkari baksa agangrikanimangmang pangchake report-ko tarigipa ong·a, jeni a·sel bang·a ra·bianirangko chagrongna gita nangenga ine aganaha.
West Khasi Hills-o Committee-ni public hearing ka·mitingo dam 21-22 songrangko Meghalaya-ni ning·o napa ine mesokaha indiba ja·man dam 36 songrang Meghalaya-o bakrimna sikaniko agantokaha, indiba dam 13-14 songrangni biming report-on dongjachim. Malang Salbari aro Tarabari sector-rangko Meghalaya sorkarini bilsi 2011 report-o a·kangaha, indiba ia biaprangko Assam-ni map-osa mesokskaa ine Conrad aganaha.
Uandake sima arini bidingo Assam baksa April ba May jao gnigpa bako agangrikaniko a·bachenggen ine u·iataha.