U·IATTIMGIPAONI
SHILLONG: Sukrobar salo, Meghalaya Legislative Assembly-ni ong·atenggipa Budget Session-ni somoiko bakrodapatjahani gimin Trinamool Congress (TMC)-ni dilgipa Mukul Sangma, suk ong·gijaniko parakatenba, ian NPP-chi dilenggipa MDA sorkarini, daitotangoni katna jotton ka·aniko mesokani ong·enga ine parakataha.
“Ia pilakan uamangni kamtangko chu·sokatna sikjae katna jotton ka·aniko mesokanisa ong·enga. Ian session-ara vote on account-ko pass ka·na ong·atenggipa session ong·ja indiba chu·gimik budget-ko pass ka·na ong·atenggipa session-sa ong·a,” ine Sangma, Sukrobar salo Assembly Speaker Thomas A Sangma-ni seng·gnang Session-ko dontongatna tik ka·gipani gimin aganaha.
TMC dilgipani parakatani gitade, batanggimin changrangoba membor-rang, an·tangtangni aganna nanganirangko aro a·doko songdongenggipa manderangni nanganirangko aganna man·na gita Assembly-ni session-rangko ong·atanio pangnan somoiko ra·dodaprongaiachim indiba ia changode somoiko namen bakkandikatesa on·engachim.
“Assembly-ni niamrango pangchake an·ching pangnan somoiko ra·dodaprongaiachim. Salario Assembly-ni kamrangko pring 10:00 bajioni 2:00 bajiona ka·e Sukrobar salode pring 10 bajioni 12 bajiona ka·skana man·genchim. Sukrobar salomangba somoikode ra·dodaprongaiachim,” ine Sangma aganaha.
2023-2024 bilsina chu·gimik budget-ko March 31 tarikni gisepo pass ka·na siengani gimin somoirang indinan chu·ongjaengaha ineba ua aganaha.
“Election ong·atani bilsiode pangnan skanggipa budget session-o vote on account-kosa pass ka·rongaiachim aro uandaken chu·gimik budget-ko pass ka·na gita dingtang session-ko ong·attairongachim. Ia niamkosa skangonin ja·rikengachim,” ine TMC-ni dilgipa aganaha.