U·IATTIMGIPAONI
SHILLONG: Tura jillani sambao niam gri municipality check gate-ko chalaienga ine Sukrobar salo, Gambegre constituency-ni Congress MLA Saleng A Sangma matnangatenba, ia check gate-ko chalaienggipa manderangni kosako rakgipa ja·kurangko de·china a·dok sorkariko didiangaha.
Sangma-ni parakatani gitade, a·doko game ge·e cha·giparangko bilakdapatna nangengani gimin janaptokengon, Tura-o niam gri municipality check gate-ko chalaiengani a·sel game ge·e cha·giparang, kajinarangko gamna nangtokengani gimin noksan ong·atanikosa man·skaengachim.
Municipality-rang toll gate-rangko chalaina man·jani gimin Tura-ni sambao municipal toll gate-ko kulianiara niamni a·palo ong·enga ineba Gambegre MLA parakataha.
Iani bidingo ua Assembly-ona aro minister-na u·iatmanaha ine talataniko on·angengon, iandake niam gri toll gate-rangko chalaienggipa manderangni kosako rakgipa ja·kurangko de·na nanga ine Sangma parakataha.
Iani bidingo a·dokni Cabinet Minister Ampareen Lyngdoh, aganchakaniko on·angskaengon, ia check gate-rangara badiaba political dolrango jak donggipa manderangni kamrangsa ong·engnaba gnang ine parakataha.
“Game ge·e cha·giparangni neng·nikanirangko chinga ma·sienga aro game ge·e cha·giparangko mangrakbatatna chinga jotton ka·enga. Iani giminsa an·ching sakantian ia daitoko ra·na nangenga,” ine Lyngdoh aganaha.
Iani bidingo agandapangkuna jechakatengon, ua Congress MLA-ni janapaniko see ra·rikaha aro iandake game ge·e cha·giparangoniko gile ra·aniko sorkari nie dongjawa ine Lyngdoh parakataha.