U·IATTIMGIPAONI
SHILLONG: Meghalaya a·doko United Democratic Party (UDP), National People’s Party (NPP) baksa bakrimenga ong·ja indiba NPP-chi dilenggipa Meghalaya Democratic Alliance (MDA) 2.0 sorkarinasa chakpaaniko on·enga ine Sonibar salo, UDP-ni president Metbah Lyngdoh parakataha.
“Chinga NPP baksa bakrimenga ong·ja indiba NPP-chi dilenggipa MDA sorkarina chakpaanikosa on·enga. MDA 2.0 sorkarina chakpaaniko on·aiani gimin ma·mongo sorkariko dilenggipa BJP-ba indide NPP baksa bakrimahama?” ine Lyngdoh, UDP-ko NPP baksa bakrimaha ine matnangenggipa manderangna aganchakaniko on·angaha.
HDR Lyngdoh sagini grigipa Synshar Kupar Lyngdoh Thabah-ko da·o Sohiong constituency-ni election-na UDP-ni candidate dake parakatna UDP-ni tom·bimonganiko ong·atanio UDP-ni president Metbah Lyngdoh, ia kattarangko aganaha.
UDP-ni kosako gipin dolrangni matnanganirangko bebera·jachina gitaba ua Sohiong constituency-ni manderangko didiangaha.
MDA 2.0 sorkario bak ong·paengoba UDP aro gipin bakrimenggipa dolrang an·tangtangni gunkode rakkiangaigen ineba Mairang MLA parakataha.
Ia 2023 bilsini Assembly election-o chegope, sorkariko dilna ka·dongsogipani bidingo janapatengon, UDP-ni sak 11 MLA-rangkosan seokaiahani gimin uamang sorkariko dilna man·jaha ine Lyngdoh parakataha.
“Kim·kimgipa sorkariko rikna gitade chinga komibeoba sak 36 MLA-rangko nanga. Ia election-oba dingtang dingtang dolrangonikosa manderang seokahani gimin darang dolan an·tangtangaride sorkariko rikna man·jaha,” ine UDP president aganaha.
Sohiong constituency-ni election-o UDP-ni candidate ong·e susana sienggipa Synshar Kupar Roy Lyngdoh-ba ia tom·anio jinmana aganprakangengon, uni mamatanggipa HDR Lyngdoh sagi, uni biapko ra·rikskae, Sohiong-ni manderangna dangdikchina chinrangko mesokangaha ine parakataha.
Meghalaya a·dokni gitcham home minister aro UDP-ni candidate HDR Lyngdoh, February-ni 20 tariko tanggitik saaniko man·enba a·gilsakko watangahachim aro uandaken Sohiong constituency-ode gipin constituency-rang baksa apsan election-ko ong·atna man·jahachim.
Photo: Sohiong constituency-ni Assembly election-na HDR Lyngdoh sagini grigipa Synshar Kupar Lyngdoh Thabah-ko United Democratic Party (UDP)-ni candidate dake UDP-ni president Metbah Lyngdoh parakatenga.
