SHILLONG: Meghalayani manderang load shedding ba bijoli kimitaniko chagrongtelnan ga·akenga, maina A·dokna nangani kri bijoliko sokatbana man·jani gimin bijoliko kimitna nangtelaigen ine Chief Minister Conrad Sangma aganaha.
Ia bilside bijolina obostarang aditan namkalbata, maina Sorkari dingtang dingtang cholrangko dakenba ia bilside February, March ja-rangode bijoliko kimitna ba siatna nangangjaha ineba Chief Minister aganaha.
A·dokna bijoliko nanganio aro bijoliko man·ani dal·en dingtanggrikani dongenga, unigimin bijoliko watanio adita nanganirangko dakna ga·akenga ine aganengon, manderangni neng·nikanirangko komiatna Sorkari jotton ka·enga indiba bijoli chu·ongmanchajaengani gimin load schedding-kode dakna nangaon ga·aktelenga ine Pa Sangma aganaha.
Unomitingo, ONGC Tripura Power Company-ni unit-ko rang·gitik chipani gimin da·omangba a·dokni bakrangode bijoli siataniko chagrongenga.
Indake ong·engon, A·doko MeECL-ni chagrongenggipa dingtang dingtang neng·nikanirangni bidingo Chief Minister, re·anggipa somoio uni New Delhi-ona re·angmiting somoio dingtang dingtang agency-rang baksa aroba Power Minister baksaba agangrikbaahachim.
“Donchipenggipa kamrangko maikae namatna man·genchim, uarangni bidingo chinga, Ma·mong sorkari aro uamangni agency-rang aro NTPC aro PDFC dakgipa company-rang baksa agangrikna nangao ga·akenga, iako dakosa MeECL-ni tangka paisani obostako namdapatna man·gen,” Chief Minister aganaha.
Indake ong·engon sud-ko maikae komiatna man·gen ba maibadake meliate dakna man·gen, uani bidingo Meghalaya Sorkari, re·anggipa somoio gronganiko dakmitingo Power Mininister-ni dakchakanikoba bi·ahachim.
NTPC baksa Power Purchase Agreement-ni gimin agangrikanirangko dakaha, jeon A·dok Sorkarini kosako adita ari done tangka gamataniko dakna tik ka·aha.
