TURA: Sak 100 skigiparangna Orientation program-ko re·anggipa March-ni 27 aro 28 tarikrango salgnina Tura-ni District Auditorium-o ong·atangaha aro ia program-ko ong·atanio Edvantange Learn-ni Founder Vincent Hilton, skigiparangni gunrangni bidingo agan-talatanirangko on·angaha.
Ia program-ko Project STAR-ni ning·o West Garo Hills District Administration-ni gita Tura-ni District Planning Office baksa nangrime ong·atangaha aro ia program-ni gnigipa salo, West Garo Hills a·jani Deputy Commissioner Swapnil Tembe, mongsonggipa sokgipa ong·e bakko ra·angaha.
Ia program-ko ong·atanio West Garo Hills a·jani Deputy Commissioner, jinmana aganprakangengon, ia sal somoirango lekka porako on·ani kamrang namen dingtangaha maina skang salrangode skigiparang, syllabus-rangko matchotatna, homework-rangko ka·atna, porikkarangko seatna aro uandakgipa kamrangnasa gisik nangbataiachim indiba ia sal somoirangode aro mongsongbate COVID sajinmani ja·mande skigiparang aro chatro chatrirangni gisepo skie on·ani aro skie ra·ani bewalrang namen dingtangaha ine parakataha.
Lekka poranio a·dok namen ja·manchakenga ine skigiparangna gisik ra·atpilaniko on·angengon, a·doko lekka porani gadangko dingtangatna gita pilakkon rakbee kam ka·china Tembe didiangaha.
Ia program-o bak ra·gipa principal-rangna aro skigiparangna ja·mano Deputy Commissioner, District Planning Officer Winje G Momin aro EDvantage Learn-ni Founder Vincent Hilton-ni jakchi certificate-rangko suale on·angaha.
