SHILLONG: Meghalaya a·dok gimikni dam 2000 Anganwadi centre-rangko taridapna gita sorkari proposal-ko on·manaha ine Mongolbar salo, a·dokni Chief Minister Conrad K Sangma parakataha.Assembly-ni Question Hour-o Nongpoh-ni UDP MLA Mayralborn Syiem-ni sing·anina aganchakaniko on·angengon, ia Anganwadi centre-rangko taridapna gita gong kror 60 korosko hisapenga ine Chief Minister parakataha.
“Ia dam 2000 Anganwadi centre-rangna bon·kamgipa hisapko tarimanahaosa chinga korosmanchakode ma·sigen,” ine Sangma aganaha.
Chief Minister-ni parakatani gitade, a·doko donggipa gimik dam 5630 Anganwadi centre-rangoni dam 3641 Anganwadi centre-rangko sorkari nieaha.
Early Childhood Development (ECD) program-na ABD-ni dakchake on·enggipa gong million 40-chin ia kamrangkoba apsan ka·na miksongenga ineba Chief Minister parakataha.
Nongpoh Assembly constituency-ni ning·o donggipa dam 44 songrango Anganwadi centre-rang dongkujaenga ine janapatengon, ia dam 44 songrangoni dam 25 songrango Anganwadi centre-rangko kulina gita sorkari, Women & Child Development Minister-na proposal-ko on·manaha ine Sangma parakataha.
A·dokni dingtang dingtang songrango, dam 266 gital Anganwadi centre-rangko aro dam 547 mini anganwadi centre-rangko rikna gita a·dok sorkari proposal-ko on·manaha ineba Chief Minister parakataha.
Anganwadi centre-rangna honorarium on·gilaniko a·dok sorkari, gong 1500-chi baridapataha ineba Sangma aganaha.
“Skangde main anganwadi centre-rangna ma·mong sorkarini gita gong 4500-ko aro a·dok sorkarini gita gong 1500-ko on·gilachim indiba da·o a·dok sorkariba anganwadi centre-rangna on·gilaniko gong 1500-chi baridapatahani gimin main anganwadi centre-rangni japrako man·ani gong 7500-ona tang·doangaha,” ine Chief Minister parakataha.