Garobadha jolrangoba niam gri koela bikotenga: AAPE

TURA: West Garo Hills a·jani Garobadha jolrangoba niam gri koelarangko bikotna a·bachengaha ine Budbar salo, A·chik Association fot Protection of Environment (AAPE) parakatenba, ia biaprango niam gri koela bikotaniko ta·raken champengchina aro niam gri koela bikotenggipa manderangni kosako rakgipa ja·kurangko de·china West Garo Hills a·jani Deputy Commissioner-ko didiataha.
AAPE-ni organising secretary Challang M Marak-ni parakatani gitade, West Garo Hills a·jani Garobadha, Goragre jolrango niam gri bikotenggipa koela a·damrang komibeoba damsnimang donga aro ia koela a·damrangara Garobadha police station-oni kilometre bri ba bongamangsan chel·grikaiachim.
Ia jolrango niam gri koela bikotaniko ta·raken champengatchina West Garo Hills a·jani Deputy Commissioner-ko didiatengon, a·kingtangtango donggipa a·ani gam-jinrangko skatang gipinrangna paljachina aro a·kingtangtangni gam-jinrangko ripingchina gita AAPE-ni organising secretary, dingtang dingtang a·king goreni Nokma sordarrangkoba didiataha.
“An·tangtangtangni man·gnina iandake a·ningni aro samtangtango donggipa gam-jinrangko pale cha·nabejok maina iandake gam-jinna mikboke nie dongaiode A·chik a·song ta·raken a·gisi pil·gnok,” ine Marak parakataha.