SHILLONG: Indian Constitution-ni Eighth Schedule-o chapatchina dabianio A·chik ku·sikni a·sel Khasi ku·sikba chapatako man·jaenga ine Khasi Authors Society (KAS)-ni ku·wataniko A·chik Conscious Holistically Integrated Krima (ACHIK) ine gital bikotgipa dol jegalataha.
ACHIK dolni education secretary Macklawrence M Sangma-ni parakatani gitade, A·chik ku·sikni a·sel Khasi ku·sikba Eighth Schedule-o chapatako man·jaenga ine KAS-ni agananiara A·chik jatko chonnikani gitasa ong·ahachim.
“Khasi ku·sikkode Eighth Schedule-o chapatna gita list ka·ahachim aro A·chikku tang·doatna gita Garorangba sea jotanirangko aro ku·tangni gimin am·sandianirangko namdapatna nangenga ine KAS general secretary-ni agananiara namen kragijani ong·aha. Haida ua A·chikrangni jelbra jelsuaniko komibata ine chanchiengnaba gnang indiba A·chikrang Meghalaya a·dokona agreba, Assam, Nagaland, Tripura, Arunachal, West Bengal aro Bangladesh a·songoba bang·en donga,” ine ACHIK-ni education secretary parakataha.
Sangma-ni parakatani gitade, Bangladesh a·songoba A·chik MP donga aro unbaksana Assam aro Tripura Assembly-oba A·chik MLA-rang dongani gimin A·chikrangko mikchepaniara namen gualani ong·enga.
A·chik ku·sikko skulrango, college-rango aro university-rangoba poraienga ine janapatengon, A·chik ku·sikchi Ph.D-koba dakenga ine ACHIK dolni education secretary parakataha.
“A·chik aro Khasi ku·sikrangko Eighth Schedule-o chapatchina Assembly-o resolution-ko ra·aha indiba A·chik ku·sikko Eighth Schedule-o chapatna gita nanganirang chu·ongja ine A·chikrangko chonnikaniara kraani ong·ja,” ineba Sangma parakataha.