SHILLONG: Meghalaya a·doko Reservation policy-ko nipilchina aro roster system-ko ra·gatkujachina didianiko dingtang dingtang dolrangni jegalaniara kragijani aro ortogri ong·a ine Bristibar salo, Voice of the People’s Party (VPP) parakataha.
“Reservation policy-ara namen chanchiningna nanggipa kam ong·a beben indiba name kam ka·aniko champenganide ong·skana nangja. A·dokni job reservation policy-o apsan ong·ani aro mande jelbra jelsuaniko niani dongja ine an·ching pilakan ma·sia. Ia job reservation policy-o mande jelbra jelsuaniko nichanggalanisan ong·aigija be·enni gita cholgri ong·giparangnaba maming cholrangko on·ani dongja,” ine VPP-ni ku·wattimgipa Batskhem Myrboh parakataha.
Reservation policy-ko nipilani gri roster system-ko ra·gataniara jat ge·sani chadamberangnade cholko on·gijani gita ong·enga ineba ua parakataha.
Meghalaya a·doko songdongenggipa jatrangni gisepo VPP-ni president Ardent Miller Basaiawmoit aro VPP dol, meligrikgijaniko ra·bana jotton ka·enga ine matnanganirangkoba ua raken jegalataha.
“Meghalaya Legislative Assembly-ni budget session-o ua (Basaiawmoit), reservation policy aro roster system-ni bidingo ong·akosa aganaha. Uni agananion ua darang jatni kosako ba saniba man·gniko ra·sekna aganenga ong·ja inen tale aganahachim,” ine VPP-ni ku·wattimgipa parakataha.
Myrboh-ni parakatani gitade, pilak jatrangan an·tangtangni man·na nangani kri namgnirangko aro cholrangko man·na nanga.
VPP-ko jat basegipa aro golmal ka·na re·bagipa dol ine agananiko bebera·jachina gitaba ua a·doko songdongenggipa manderangko didiataha.
“Ia pilakan badiaba dolrangni chingko (VPP)-ko ong·gija dake biming man·atna jotton ka·anisa ong·enga,” ine Myrboh aganaha.
Meghalaya a·doko VPP, dingtanggipa politics-ko ra·banasa kamko ka·enga ine janapatengon, Meghalaya a·doko namroro silroroaniko ra·bana gita VPP baksa bakrimchina ua Garo Hills-o songdongenggipa manderangkoba mol·molataha.
Meghalaya a·doko namroro silroroanina aro tom·tomanina mikkangchi VPP-mangmangsan ka·dongani ong·enga ine janapatengon, Garo Hills-o chakpaanirangko man·gipa dolrang aro ia dolni dilgiparangba Garo Hills-o maming namroro silroroaniko ra·bana man·jaha ine VPP-ni ku·wattimgipa parakataha.