TURA: Meghalaya a·dokko man·chengani somoion Tura-ko Winter Capital dakna songgigrikani dongani gimin Tura-ko Second ba Winter Capital songaniara dabina nanggipa kam ong·ja ine Bristibar salo, A·chik Conscious Holistically Integrated Krima (ACHIK) dol parakatenba, Tura-ko Winter Capital song, Additional Secretariat-ko ta·raken Tura-ona apjitbachina a·dok sorkariko didiataha.
Iani bidingo a·dokni Chief Minister Conrad K Sangma-na sedoatengon, chengo Meghalaya a·dokna krengdilanggipa pagitchamrangan Tura-ko Winter Capital aro Shillong-ko Summer Capital dakna gita ku·rang on·chenggiparang ong·ani gimin Tura-ko Winter Capital dakaniara sorkarini daitoan ong·enga aro ia jumangko chengonin Garo Hills-ni manderang ka·donge nichakengachim ine ACHIK parakataha.
“Pagitchamrangni songgigrikgimin gita Tura-ko Winter Capital dake Shillong-ko Summer Capital dakgenchimode ian a·dokni pilak biaprangon apsan namroro silroroaniko aro dal·roroaniko nikna chol ong·gen. Tura-ko Winter Capital dakgenchimode ian Garo Hills-ni man·e cha·aniko bariatani gitaba ong·e manderangna janggi tangani cholrangko aro kam ka·e cha·ani cholrangko ong·katatna dakchakaniba ong·gen,” ine ACHIK-ni dilgiparang parakatenba, pagitchamrangni ku·rachakaniko da·o chu·sokate on·skachina gita NPP-chi dilenggipa MDA sorkariko didiataha.
Meghalaya a·dokara, Khasi, Jaintia aro Garo jatrangni songdong a·chagipa biap ong·e joltangtangni biaprang donga ine janapatengon, da·o dipet Shillong-kosa skotong songjinma dakengani a·sel Garo Hills-ni manderangde pilak kamrangna re·a doanirango neng·nikanirangko chagrongna nangtokenga indiba Tura-ko Winter Capital dakgenchimode, Garo Hills-ni manderangnaba kamrangko ka·anio altubatgnokchim ine ACHIK parakataha.
Tura-ona Additional Secretariat-ko ta·raken apjitbachina sorkariko didiatskaengon, Tura-ona Additional Secretariat-ko ra·baanichi Garo Hills-oba bang·en dingtanganiko aro namroro silroroaniko nikna man·gnokchim ine ACHIK parakataha.
Indake ong·engon, Tura-o Additional Chief Secretary aro Additional DGP-ko donkame kam ka·atchina gitaba ACHIK, a·dokni Chief Minister-ko didiataha.