TURA: Meghalaya a·dokni Job Reservation Policy-ko rakkina gita High Court-ni rai on·gipa Roster system-ko Khasi Hills a·jao dingtang dingtang dolrang jegaltokengon, Roster system-ko ra·gatanichi darang jatrangba an·tangtangni bil aro man·gnirangko gimaatjawa batesa pilak jatrangan an·tangtangna tikatgimin bak rengsiko man·gen ine Garo National Council (GNC) parakatenba, ia Roster system-ni bidingo jera ra·e dongchagija High Court-ni ge·etko chu·sokatchina Meghalaya sorkariko didiangaha.
“Meghalaya a·doko Roster system-ko ra·gataniara maming gital niamko ra·gatenga ong·ja aro ian Madhya Pradesh, Karnataka aro uandakgipa a·dokrango ra·gatgipa niam ba ja·rikanian ong·a. Reservation policy-ko rakkianio Roster system-ko nangchongmota aro iani giminsa Meghalaya High Court-ba raiko on·ahani gimin an·ching pilakan High Court-ni rai on·aniko mande ra·na nanga,” ine GNC-ni general secretary Augustine R Marak parakataha.
Marak-ni parakatani gitade, Meghalaya Reservation Policy-na Roster system-ko ra·gatani bidingo a·dokni gitcham MLA CR Marak-ba Assembly-o resolution-ko ra·ahachim indiba ua somoio gitcham chief minister Dr Mukul Sangma-ni dilanichi gitcham sorkari, maming chanchirimchengani gri uni resolution-ko amatahachim.
“Meghalaya Reservation Policy-ko tarichengaonin Roster system-ko ra·gatna nangachim indiba dilgiparangni a·sel Meghalaya a·doko namen ja·manchakaha,” ine GNC-ni dilgipa parakataha.