SHILLONG: Re·anggipa February-ni 27 tariko a·dokni dam 59 Assembly constituency-rango election-ko ong·atani ja·man bang·bata regional party-rangan NPP-chi dilenggipa Meghalaya Democratic Alliance (MDA) 2.0 sorkario bakrimahani gimin re·baenggipa May jani 10 tariko ong·atna sienggipa Sohiong Assembly constituency-ni election-ode manderang gipin dolrangko jegale Congress dolkon seokskagen ine Congress dolni dilgiparang ka·dongsotokenga.
Meghalaya Legislative Assembly election-ko re·anggipa February 27 tariko ong·atahaoba, re·anggipa February-ni 20 tariko, a·dokni gitcham home minister aro United Democratic Party (UDP)-ni candidate HDR Lyngdoh, tanggitik ka·tong saaniko man·e siangahani gimin Sohiong constituency-ode MLA election-ko gipin constituency-rang baksa apsan ong·atjahachim ine nikna man·a.
Indake ong·engon, Sohiong Assembly election-na Congress dol bakan campaign ka·aniko a·bachengatgnok aro da·o pilak membor-rangan kamrangko ka·soengaha ine Congress Legislative Party (CLP)-ni dilgipa aro Mylliem MLA Ronnie V Lyngdoh parakataha.
Sohiong Assembly election-na United Democratic Party (UDP)-ni gitaba HDR Lyngdoh sagini grigipa Synsharlang Kupar Lyngdoh Thabah-ko candidate dake adita salrangna skangsan parakatmanahachim ine nikna man·a.
Gipin candidate-rangde skangan nomination-rangko file ka·somanskaahachim aro ia candidate-rangara, NPP-ni Samlin Malngiang, Congress-ni S Osborne Kharjana, HSPDP-ni Sandondor Ryntathiang, BJP-ni Seraph Eric Kharbuki aro TMC-ni Stodingstar Thabah ong·engachim.
Ia dolrangoni da·o dipet UDP, NPP, HSPDP aro BJP dolrangde MDA 2.0 sorkario bakrimtokahachim.
Indake ong·engon, Congress aro TMC dolrangna agrede pilak dolrangan NPP-chi dilenggipa MDA 2.0 sorkario bakrimtokahani gimin Sohiong-ni MLA-ko seokanide constituency-ni manderangosa pangchakaignok ine Ronnie Lyngdoh parakataha.
“Ia dolrang election-na skangde NPP baksa bakrimjawa ine agantokachim indiba election-ni result-rangko parakatani ja·mande apsan bakrime kamko ka·tokengaha. Uni gimin da·o Sohiong-ni manderangba iako nikaha aro ia election-ode an·tangtangni namnikako seokna cholko man·gnok,” ine CLP-ni dilgipa aganaha.