TURA: Meghalaya a·doko tangka paisa jakkalsretaniko bon·atna aro dingtanganiko nikna ka·dongesa manderang BJP-na pu·onahachim ine Meghalaya Bharatiya Janata Party (BJP)-ni state vice president Bernard N Marak janapatenba, manderangni ka·dongsoaniko chu·sokatna gita a·dokni pilak constituency-rangon ‘War against Corruption’ ba tangka paisa jakkalsretaniko warachakna ja·kuko de·chakatgen ine parakataha.
“Uni gimin a·songni Prime Minister Narendra Modi-ni adita salrangna parakatgimin gita Meghalaya a·dokoba tangka paisa jakkalsretaniko chinga warachakanggen,” ine Robibar salo, Marak parakataha.
Ma·mong sorkarini scheme-rangko mande sakpraknan aro nokdang ge·antinan kakket ong·e watatengachim ine janapatengon, a·doko ia scheme-rangko biming mingtaiani aro manderangona sokatgijaniara BJP-na namen chanchina nanggipa kam ong·enga maina ian Prime Minister Narendra Modi-ni niksamsoanirangko pe·ani gita ong·e gipinrangsa rasongko man·skaenga ine BJP-ni state vice president parakataha.
“Manderangni Narendra Modi-o ka·dongani aro grapanirang indin ong·gramjawa. Ma·mong sorkarini scheme-rangko man·jaenggipa constituency damantionan chinga re·ange manderangni neng·nikanirangko knatime ra·bagen,” ine Marak parakataha.
Prime Minister Narendra Modi-ni niksamsoanirangko manderang ma·sie ra·china gita a·dokni BJP, dingtang dingtang scheme-rangni gimin social media gita talate on·anirangko dakgen ineba Marak parakataha.