SHILLONG: Re·anggipa February jao ong·atanggipa Meghalaya Assembly election-o a·dokni BJP dol, dam 60 seat-rangoni damgnikosan chena man·e chu·sokgipa ong·jahani gimin da·o re·baenggipa bilsini Lok Sabha election-na skangde BJP-ko bilakbatatna gita miksongsotokengaha.
BJP official saksani kobor ra·timgiparangna parakatani gitade, Lok Sabha election-na da·o bilsisamang dongkuengani gimin candidate-rangko seokana batede party-ko bilakbatatani giminsa BJP-ni dilgiparang da·o chanchina nangkuenga.
Lok Sabha election-ko bilsisamangni ja·mansa ong·atna siengani gimin da·o dipet candidate-rangko seokna gita agre seng·gnangdugakuenga ineba ua parakataha.
“A·songni pilak biaprangon da·o dipet chinga candidate saksakoba seoka dongkuja,” ine BJP-ni dilgiparang aganaha.
Re·baenggipa 2024 bilsini Lok Sabha election-o BJP dol, a·dokni Shillong aro Tura seat damgnion susanaba gnang ine niksamsona man·engachim.
Lok Sabha election-na sawarang tikitna dorgastorangko galenga ine sing·anina aganchakaniko on·angengon, tikitko on·ani giminde ma·mongni dilgiparangsa chanchigen indiba da·o election-na bang·en somoirang dongkuengani gimin iani bidingo chanchia dongkuja ine BJP official parakataha.
Batanggimin changbrina kingkingan Shillong Lok Sabha seat-o Congress dolni Vincent Pala, altuaen chena gita man·aiahachim aro Tura seat-ora Conrad Sangma-ni nokdangko darangba cheskana man·kujaenga ine nikna man·a.
