TURA: South Garo Hills a·jani Gasuapara jolo donggipa Nagrajora songni transformer-ko kapengchina u·iatani ja·manoba ia transformer-ko kapengkujaengani a·sel jolni manderangna kenchakna nangani ong·enga ine Association for Democracy & Empowerment (ADE) Gasuapara regional unit parakatenba, jolo songdongenggipa manderangni namgnina ia transformer-ko ta·raken kapengchina Dalu-o donggipa MeECL Sai Company-ni project manager-na sedoataha.
ADE Gasuapara regional unit-ni president Callymeccan Ch Sangma-ni parakatani gitade, Nagrajora-o donggipa transformer-ko kapengchina gita uamang batanggimin somoirangon official-rangna u·iatmanahachim indiba da·alonan ia transformer-ko kapengkujaengani a·sel jolo songdongenggipa manderangna aro mongsongbate bi·sarangna kenchakna nangani ong·engachim.
“Uni gimin chinga ia jolrango songdongenggipa manderangni namgnina ia transformer-ko ta·raken kapengchina didiatenga,” ine Sangma, Dalu-o donggipa Sai Company-ni project manager-na sedoatgipa chittio parakataha.
