SHILLONG: Meghalaya a·dokni Reservation Policy-na roster system-o nangchakegipa namgnirangko Meghalaya High Court nichenggija, iana ra·anggipa Public Interest Litigation (PIL)-ko jegalataha.
High Court-ni parakatani gitade, roster system-ko nipiltaichina mol·molaniara manderangni namgnina ong·genchimoba a·bachengo ong·enggipa obostarangko namjabatatna jotton ka·ani gitasan ong·aiengachim.
1972 bilsini January jao Meghalaya a·dokko man·chengaonin reservation policy-ko ra·gatahaoba 2022 bilsio kamni bidingo ia Court-ni Division Bench-ona ra·anggipa mamla-o roster system-ko taria dongkuja ine nikahani gimin iandake kam ka·sretanirangko nike, roster system-ko tarikujaskal a·doko kam on·anirangko dontongatchengaha ine High Court parakataha.
“Gipin ge·etanirangkoba on·dapaha aro roster-ko tariaha ine nikani ja·man tarigimin roster-ko name nichengani grian ia mamla-ko bon·ataha. Ia roster-o reservation policy-ni 85 percent-ni gitan niamrangko ja·rika ineba nikna man·aha. Uni gimin gital Assembly-o roster-ni gimin chanchirimengon, kacharini rai on·anirangkoba ra·na nanga,” ine Meghalaya High Court janapatenba, roster system-ko mai bilsirangoni ja·rikna sienga, uani giminde maming chanchia dongkuja gita nikenga ine parakataha.
“Uni gimin iako sorkari aro administration-ni gisepo name tarichina aro ja·mano niamo pangchake manderangni sing·na nanganirang donggenchimode jinmani mikkangona ra·bana man·gen,” ine High Court parakataha.
Da·o dipet iani bidingo Assembly maming ja·kurangko de·na tik ka·a dongkujagenchimode iani bidingo High Court, bichalna ra·baaniko ra·chakna man·kujawa ineba High Court parakataha.
