SHILLONG: Batanggimin aro mikkangchina nisamsoani gnang re·anggipa bilsini May 10 tariko bikotchenggipa Roster Maintenance Policy (RMP)-ko ra·gatchina gita Mongolbar salo, Khasi Students Union (KSU), NPP-chi dilenggipa MDA 2.0 sorkariko didiataha.
“Reservation Policy-ko 1972 bilsiosa tariahani gimin da·o iano pangchake donganiara kraani ong·jaenga aro batanggimin somoirangko nipile a·dok sorkarini roster system-ko ra·gataniara a·dokni ia bakrango kamrangko sandienggiparangnade nangchakeaniko ra·bagen,” ine General Executive Council (GEC) tom·ani ja·man KSU-ni president Lambokstarwell Marngar, kobor ra·timgiparangna parakataha.
Roster system-ko bikotengani bilsi dipet ong·jaode ia bilsioni ra·gatchina gita ua a·dok sorkarina ku·pattianiko on·anggen ineba KSU-ni president parakataha.
2001 bilsionin Roster system-ni gimin KSU aganengachim ine janapatengon, “State reservation policy-ko ra·gatanio chinga bang·en meligrikgijanirangko nikaha indiba ian namen chanchiningna nanggipa kam ong·ani gimin iani bidingo agananiara ong·ja ine chinga ma·sia. Kachario didiani ong·katani ja·mansa roster system-ni katta ong·katbaaha,” ine Marngar aganaha.
Marngar-ni parakatani gitade, ia roster system-ni a·selan bangbang ong·e dongenggipa kamrangko gapatna man·jaha ine adita salrangna skang ong·atanggipa Assembly budget session-o mitam minister-rangba aganahachim.
Uni gimin badia bilsi dipet aro maikai ia roster system-ko ra·gatgen ukon sorkari ma·sikujaenga ine KSU president parakataha.
Iani bidingo talbate ma·sie ra·na gita uamang, ainni bidingo u·i-ma·sigipa manderang baksa agangrikmanaha ineba Marngar parakataha.
“Roster system-ni bidingo chinga maikai ja·kurangko de·angna sienga, uni gimin da·o dipet chinga parakna man·kujawa indiba iani bidingo chinga gisiko nangen jako ra·aha,” ine KSU-ni president aganaha.
Ian Khasi jat gimikna nangchakegipa ong·engani gimin sikkele kam ka·anide chol ong·jawa ineba ua parakataha.
“A·dok sorkarina maming ku·pattianirangko on·na skangba chinga nambate ma·sie ra·chengna nangenga indiba angni sing·anide seokako man·gipa dilgiparang iani bidingo ku·rangko on·na man·genma?” ine Marngar sing·doataha.