TURA: Meghalaya a·dokni bilsi 50 batpile re·mikkanganio A·chikrangna chamgimin kamrangko chu·onga gita man·jahani gimin kamrangko on·china dabianiko aro Tura-ko Winter/Second Capital dakchina dabianiko A·chik Conscious Holistically Integrated Krima (ACHIK) maming dakeba ra·piljawa ine parakataha.
ACHIK Me·chik dolni secretary Reche Chambugong Wa·ge-ni parakatani gitade, Meghalaya a·dokko man·chengaonin A·chikrangna chamgimin kamrangko chu·onga gita on·jahani gimin A·chikrangni man·na nangenggipa bak rengsiko on·china uamang dabiangkugen.
Garo Hills-o songdongenggipa A·chik manderang, an·tangtangni man·na nanggipa bak rengsiko man·jahani a·sel neng·nikanirangko chagrongna nangaha ine janapatengon, Job Reservation Policy-ni ning·o A·chikrangna chamgimin bak rengsiko on·aniara A·chikrangni man·na nangani aro bilan ong·a ine ACHIK Me·chik dolni secretary parakataha.
“Job Reservation Policy-ni Roster system-ko ra·gatchina rai on·anian bilsi 50 batpile A·chikrangni kosako ong·gija dakaniko mesokani ong·aha. Uni gimin A·chikrang an·tangtangni bak rengsiko man·pana gita bilaken chadengna nanga,” ine ua parakataha.
Tura-ko Winter/Second Capital songchina dabianiba ACHIK dolni minggipin mongsonggipa dabiani ong·engani gimin iako chu·sokate on·kujaskal uamangni dabianiko dontongjawa ineba Reche Chambugong Wa·ge parakataha.
Tura-ko Winter/Second Capital songchina dabianio Garo Hills-ni dingtang dingtang dolrangba bakrimaniko on·engani gimin mittelpilangengon, ia dabianio Khasi Hills-ni dingtang dingtang dolrangba uamang baksa bakrimaniko on·gen ine ACHIK Me·chik dolni secretary, ka·dongchakenganiko parakataha.
