SHILLONG: Meghalaya a·doko bijoliko chu·onga gita man·jaengani a·sel sorkari, bijoliko kimitna nangao ga·akengon, da·o dipet ia neng·nikanirangko sorkari namatna man·kujaengani gimin a·doko songdongenggipa manderang rang·speaniko man·kujanaba gnang.
Budbar salo, a·dokni Power Minister AT Mondal-ni parakatani gitade, a·dokni bang·bata hydro project-rangan mikka chiosa pangchaktokna nangengon, ma·mongonikoba chu·onga gita bijoliko man·jaengani gimin aro a·doktangni bijoli bikotgipa unit-rangba kam ka·jaengani gimin a·doko bijolina chu·onggijaniko namatna man·kujaenga.
Bijoli on·sregrikani bidingo janapatengon, bijoliko on·sregrikna gita bang·en nangenga aro bijolini damrang namen rakdugaengani gimin Meghalaya a·dok baksa bijoli on·sregrikgipa company-rangba da·o Meghalaya a·dok baksa on·sregrikna siktokjaha ine Power Minister parakataha.
Da·o dipet Meghalaya a·doko bijoliko nanganiara million 200 unit ong·enga indiba bijoliko man·aniara million 88 unit-san ong·enga ine janapatengon, a·dokni million 35 unit-ko man·soronggipa Kopili Stage I power-ba nosto ong·aha aro Meghalaya a·dokna bijoli on·enggipa gipin damgni project-ba den·galako man·aha ine Power Minister parakataha.
A·doktangni Hydro power project-rangko niatskagenchimode, Myntdu Leshka Hydro Power Project-ni Unit I aro Unit II nosto ong·ahani a·sel da·o tarina donengkua aro Umiam project-ni Unit II-koba re·anggipa bilsini November ja intalan da·o chipe donkuenga ine nikna man·a.
Meghalaya a·doko iandake bijolirang chu·ongjaengani a·selan da·o salantian kontasnimangna bijoliko kimitna gita nangenga aro iani a·selan a·doko songdongenggipa manderang neng·nikanirangko chagrongna nangtokengachim.
Indake ong·engon, Kynshi Stage II Hydel Project-na Jaypee Group baksa Memorandum of Agreement (MoA)-o soi ka·grikanikoba a·dok sorkari, Budbar salo den·galpilna gita tik ka·angaha ine u·iataha.