NONGPOH: Budbar salo, Ri Bhoi a·jani Anti Narcotics Task Force (ANTF) official-rang, mande saksako pekatgipa ‘heroin’ samrang baksa rim·na man·aha.
Rim·ako man·gipa mandeara East Khasi Hills a·jani Shillong songjinmao donggipa Upper Jail Road East-oni bilsi 35 ong·gipa Dipankar Ghosh ong·achim aro uko ANTF-ni official-rang, ML-10A 2089 gario songrebaengmitingko Nongpoh Police Station-ni ning·o donggipa Shangbangla-o rim·na man·aha.
Ia mandeoniko ANTF-ni official-rang, sabon bakso ge 20-o chipe ra·baenggipa heroin samrangko man·aha aro ia heroin samrangko toe nion, gram 191.02 ong·achim ine official-rang parakataha.
Ia mandeko Nongpoh Police Station-ona rim·angani ja·man Narcotic Drugs & Psychotropic Substances (NDPS) Act-ni ning·o mokordoma ka·aha ineba u·iataha.
