TURA: Garoland a·dokna dabie Garoland State Movement Committee (GSMC)-ni jinma tom·bimonganiko re·baenggipa April-ni 15 tariko, East Garo Hills a·jani Williamnagar (Simsanggre)-o ong·atenga ine GSMC-ni co-chairman Balkarin Ch Marak u·iatenba, ia tom·bimonganiona re·bae bakko ra·echina gita Garo Hills gimikni NGO-rangko, dingtang dingtang songni nokni dilgiparangko, toromni dilgiparangko aro Garo Hills-o songdongenggipa pilak manderangkon didiataha.
Marak-ni parakatani gitade, Garoland a·dokna dabianiara da·o A·chik a·songo songdongenggiparangni gital dabiani ong·ja indiba chengo Pa Sonaram R Sangma sagini chasongonin dingtang a·dokna dabianiara dongachim.
“An·chingni gitcham dilgipa Pa PA Sangma sagiba Garoland a·dokna ku·monge, Parliament-o ku·rangko on·angaha aro ia chonchongipa Tribal-rangnaba, dingtang state-rang jekai, Gorkhaland, Bodoland, Karbi, Tipraland aro uandakgipa dingtang dingtang a·dokrangnaba chakpae ku·rangko on·angaha. Chinga da·oba uni kattarangko gualja aro Parliament-o iani gimin ku·rangko on·ahani gimin chinga pangnan uko mande ra·a. Ua da·oba dongkuode Garoland a·dokna ku·rang on·aniko nikkunaba gnangchim,” ine GSMC-ni co-chairman parakataha.
Williamnagar-o ong·atenggipa jinma tom·bimonganiona re·bae bakko ra·echina gita Garo Hills gimikni manderangko didiatengon, “Beben chinga GSMC-ni bimingko done iako dakdilenga indiba ian A·chik a·songo songdongenggipa sakantini daitoan ong·a. Chinga na·simangni dedrang ong·e haturi ba hammer gitasa ong·aia aro na·simangsa chingko skie ba aganne A·chik a·song gimikni pal dakdilna bilko on·na man·a,” ine Marak parakataha.
