SHILLONG: Re·anggipa general election-ni somoio UDP candidate HDR Lyngdoh-ni sichangani gimin dontonggipa Sohiong constituency-o bypoll ong·atna gita Election Commission tarisoengaha.
Meghalaya-ni CEO FR Kharkongor-ni Sombaro parakani gitade, constituency-o static surveillance team, video surveillance team aro flying squads dongchapgipa dolgittam nirokgiparangko donataha.
“ SST, VST aro flying squads dongchapgipa dolgittaman RO aro District Election Officer-ni nirokanio, a·sel obostarangko nirok-simsakenga.
Da·o dipetode, model code of conduct-ko pe·ani giminde maming kobor dongkujaenga aro apsandaken tangka-paisa aro chu dakgiparangko man·aniba dongkujaenga.
Indake chel·chaksoanina cholrangko daka gita dake, constituency-ko dam 6 sector aro dam 2 zone-rang dake bak dakaha aro bol 53 silchidarerangko pakwateaha aro sakdokni kosako ge·etaniko on·e donaha.
Constituency-o dam 63 polling station-rang donggen aro me·asa voter sak 17096 aro me·chik voter sak 17687-ko chane gimikchi sak 34783 voter-rang donga.
Unomitingo da·o Good Friday aro Easter matchotangahani gimin haida election-na campaign ka·anirang ding·chaognok ine ka·dongsoenga.
BJP State president, Ernest Mawrie agana je uamangni candidate-ko skangon seokman·ahani gimin party, ia seat-na mikpakma nienga. Apsandake HSPDP aro NPP dakgipa gipin party-rangba Sohiong seat-ko chena gita nidingtokenga, unomitingo UDP, uamangni party candidate sigipani kosako ka·sachakani vote-rangchi chena ka·dongskaenga.
Sohiong constituency-o May 10 tariko puonatgen aro puongiminrangko May 13 tariko chane bebu-birongko parakatgen.
