TURA: Batanggimin somoirangonin Meghalaya a·doko Job Reservation Policy-ni roster system-ko ra·gatani bidingo jera ra·grikanirangko nikna man·engon, ia roster system-ko ra·gatani bidingo jera ra·grikanichi 1972 bilsio ra·gatgipa Job Reservation Policy-ko nipiltaiani ba taridapani giminde ra·bana nangani katta dongja ine Tengsak G Momin-chi dilenggipa Garo Students Union (GSU) Central Executive Committee (CEC) parakataha.
GSU-ni president Tengsak Gabil Momin-ni parakatani gitade, ia sal somoirango dingtang dingtang dolrangni jera ra·enggipa kamara 2022 bilsini April jao Meghalaya High Court-ni ge·etanio pangchake Meghalaya sorkarini tarigipa roster system-ko ra·gatani giminsa ong·enga aro ia roster system-ko ra·gatani gimin jera ra·grikengon, 1972 bilsio Meghalaya a·dokko man·dile on·chenggipa pagitchamrangni tarie donanggipa Meghalaya Reservation Policy-ode maming nangchakeanirang dongna gita nangja.
Roster system ra·gataniko GSU-ba namnikpaenga ine janapatengon, Garo Hills-o namgipa skul, college-rang dongjani a·selan Garo Hills-o A·chikrang aro gipin Tribal jatrang namgipa lekka porani gadangko man·tokjaenga aro da·onan engineering college aro medical college-koba a·bachengkujaenga ine GSU president parakatenba, iani giminsa a·doko songdongenggipa Tribal jatrangna apsan cholko on·na gita Meghalaya Reservation Policy 1972-ko kakket aro bebeo ja·rikna nangchongmotenga ine talataniko on·angaha.
Meghalaya Reservation Policy donggenchimoba kakket aro bebeo ja·rikjaengani a·selan A·chikrang aro Garo Hills-ni gipin Tribal jatrang, an·tangtangni bak rengsiko man·tokjaenga ine nikahani giminsa roster system-ko tarichina Meghalaya High Court ge·etaniko on·aha ineba ua parakataha.
“Roster system dongjani a·selan dingtanggrikaniko chinga sandie nion, 2007 bilsio 500-na baten backlog dongaha aro da·ode batsranggnok. Ia backlog-rangko da·o gapatpilanide altua kam ong·jawaha beben indiba batanggimin somoirango kamrangko man·na nanggipa manderang man·tokjahani gimin mikkangchi iandakgipa obostarang ong·taijana gita roster system-ko ra·gatna nangchongmotenga,” ine GSU-ni president parakataha.
“Uni gimin hai an·ching pilak kamrangon apsan cholko on·grike janggi tangna indiba ia cholrangko sualgrikanio neng·nikanirangko man·enga ong·ode Winter Capital ba dingtang a·dokko bikotani bidingo chanchirimskana. Apsan bak rengsiko man·pana gitade chingna Job Reservation Policy-ko nangchongmota,” ine Momin parakataha.
