NONGPOH: Mongolbar pringo, Ri Bhoi a·jani Anti Narcotics Task Force (ANTF) dolni sipairang, Silchar-oni Guwahati-ona re·angenggipa bus gari bolsaoniko drugs ba pekatgipa samrangko man·aha aro iani bidingo mande sakgnikoba rim·aha.
Silchar-oni Guwahati-ona re·angenggipa bus gario, pekatgipa samrangko ra·angenga ine koborko man·soani ja·man ANTF-ni sipairang, Mongolbar pring 8:30 bajimango, AS-24C 9855 bus gariko rim·sona man·aha aro ia bus garioniko am·sandion katepgipa bostu ge·sniko man·aha. Ia bosturangko man·ani ja·man bilsi 22 ong·gipa Rohit Raj Pandey aro bilsi 19 ong·gipa Bipul Kumar-koba police-rang rim·na man·aha.
Ia katepgipa bosturangko ANTF-ni official-rang kulie nion, ian ganjarangsa ong·achim aro ia ganjarangni jreaniara kg 8.6 ong·a ine ma·sina man·aha.
Rim·ako man·gipa mande sakgniara Bihar a·dokni skotong Patna songjinmaoni ong·achim ineba ma·sina man·aha.
Ia manderangni kosako NDPS Act-ni dongimin niam gita ja·kurangko de·anggen ine police-rang u·iataha.
