SHILLONG: Roster system-ko ra·gatani bidingo dingtang dingtang dolrangni gisepo jera ra·grikanirang ong·engon, 1972 bilsio ra·gatchenggipa Meghalaya Reservation Policy-kode ‘kal·akjachina’ aro skango jekai ong·a ugitan donaichina Hynniewtrep National Youth Front (HNYF)-ni president Sadon K Blah-ba didiataha.
“Angni chanchiani gitade, reservation policy-ko Assembly-o taridaptaigenchimode uan kacharini mamlaona sokani ong·taigen, uni gimin a·bachengo jekon tariahachim, apsan daken dongaichina,” ine Blah, kobor ra·timgiparangna aganaha.
Blah-ni parakatani gitade, Reservation policy-o 50 percent-na batna man·jawa ine Supreme Court-ba rai on·manahachim.
Reservation policy-ko kal·akna jotton ka·anirang donggenchimode ja·mano namjabata obostarang soknaba gnang ineba HNYF-ni president parakataha.
Batanggimin bilsirangoniko nipile roster system-ko tariskagenchimode kam sandienggiparangna bang·a nangchakeaniko ra·bagen ineba Blah parakatskaaha.
“High Court-ni rai on·ani salonisa roster system-kode ra·gatna nanggen aro batanggimin bilsirangko niede ra·gatna man·jawa,” ine ua aganaha.
Iana skang, Federation of Khasi Jaintia & Garo People (FKJGP) dolni gitaba Reservation Policy-ko gital dake taripilchina dabianiko raken jegalatahachim ine nikna man·a.
“Ian namen chanchiningna nanggipa kamsa ong·a aro man·a dipetde 1972 bilsio ra·gatgipa State Reservation Policy-ko apsan daken donon nambata. Ia Reservation Policy-ko taridapanichi an·ching man·dapani pal batesa gimaatna nangnaba gnang,” ine FKJGP-ni president Dundee Cliff Khongsit parakatahachim.
Meghalaya a·doko mongsongbatgipa Khasi aro Garo jat dolgnian ia Reservation Policy-o 40 percent ka·e bak rengsiko man·engani gimin dolgnian namgniko man·paenga ineba ua aganahachim.
