SHILLONG: Opposition-o ong·enggipa Congress aro Trinamool Congress (TMC) baksa bakrimani griba Opposition-ni kamko ka·angkugen ine Voice of the People’s Party (VPP) parakataha.
“Opposition dolrangni gisepo bakrimani dongjagenchimoba VPP kamtangko ka·enga aro kamtangko ka·anio maming gualani dongja. Opposition party ong·e chinga VPP, kamtangko name ka·angkugen,” ine VPP-ni ku·wattimgipa Batskhem Myrboh parakataha.
Adita salrangna skang ong·atanggipa budget session-ni gimin janapatengon, “Ia Assembly session-o Opposition dolrangni gisepo bakrimani dongjagenchimoba VPP kamtangko name ka·aha,” ine Myrboh parakataha.
“Ia budget session-an manderangko gisik nangatgipa session-rangoni mingsa ong·aha ine bang·a manderangan agantokaha aro dingtang dingtang kamrangna sorkariko sing·doahani gimin VPP-ko mitteltokaha,” ineba ua aganaha.
Opposition dolna kene sorkari, budget session-ni somoiko bakkandikataha ine janapatskaengon, “Ia budget session-o salsni somoikosan donaiaha aro Governor-ni aganprakgipani bidingo chanchirimna gita Opposition membor-rangna minute 10-kosan on·aiaha. Ian VPP dolna opposition-ni kamko ka·na gita sorkarini on·na sikgijaniko mesokani ong·a,” ine VPP-ni ku·wattimgipa parakataha.
VPP-ko state political party dake Election Commission-ni ra·chakahani gimin kusi ong·aniko parakatskaengon, re·baenggipa bilsio ong·atna sienggipa district council aro Lok Sabha election-na VPP, nisamsoenga ine Myrboh parakataha.
“Chinga state political party ine ra·chakako man·ahani gimin chu·ongnike dongaijawa. Assembly election-o chinga seat dambriko cheaha aro 2028 bilsiode bilakbatgipa dol ong·na gita party-ko bilakbatatna jotton ka·gnok,” ine Myrboh aganaha.
