SHILLONG: Roster system-ni bidingo pilak dolrang baksa agangrikani chu·sokjagenchimode aro Assembly-ni special session-ko ong·atjagenchimode ramarangona re·ange jingjengatgen aro manderangona re·ange iani bidingo agangrikgen ine Voice of the People’s Party (VPP) parakataha.
Roster system-ni bidingo skanggipa Cabinet tom·e chanchirimangchenggen aro uni ja·man MDA-o bakrimenggipa dolrang baksa chanchirimani ja·mansa nangkugenchim ong·ode ia Roster system-ni gimin chanchirimna gita chinga pilak dolrangni tom·anikoba ong·atanggen ine a·dokni Deputy Chief Minister Prestone Tynsong-ni ku·rachakaniko on·atani ja·man VPP, iako parakatskaaha.
“Sorkari baksa agangrikanichi iako chu·sokatna man·genchimode anga agan-chanchirimanio maming ong·gijakode nikja. Indiba jinma chanchirimani ja·manoba chu·sokjagenchimode aro Assembly-o sorkari, special session-koba ong·atjagenchimode chinga manderangona re·angana agre maming gipin cholrang dongjawa,” ine VPP-ni ku·wattimgipa Batskhem Myrboh parakataha.
Roster system-ni bidingo sorkarini gita aro dingtang dingtang dolrang baksa chanchirimna ku·rachakaniko on·atahaoba Assembly-ni special session-ko ong·atna gitade Deputy Chief Minister jechakatskaahachim ine nikna man·a.
Indake ong·engon, a·bachengonin uamang roster system-ni bidingo chanchirimna gita Assembly-ni special session-ko ong·atchina dabiahani gimin da·oba uamang special session-ko ong·atchina nangnikenga ine VPP-ni dilgipa parakataha.
“Roster system-ko ra·gatani bidingo a·bachengode sorkari, Meghalaya High Court-ko dos galahani gimin chinga special session-ko ong·atchina dabienga. High Court-ni ge·etanichi sorkari dongnue chakna man·jawa,” ine Myrboh aganaha.
Assembly-o chanchirimna gita uamang special session-ko ong·atchina chittiko sedomanaha aro da·o uamangni chittina aganchakaniko sengengkua ineba Myrboh parakataha.
