SHILLONG: Ia April jani 17 aro 18 tarikrango G20 tom·bimonganiko ong·atna gita Meghalaya sorkari, pilak nanga kamrangko tarisomanaha.
Iani bidingo kobor ra·timgiparangna talataniko on·angengon, ia jani 17 aro 18 tariko ong·atenggipa G-20 tom·bimonganiona re·baenggipa sak 120 delegate-rangko rimchaksona gita sorkari tom·e chanchirimaha ine Budbar salo, a·dokni Deputy Chief Minister Prestone Tynsong parakataha.
“G-20 tom·bimonganiko sokachakna gita chinga bang·bata kamrangkon matchotsoaha,” ine Tynsong parakataha.
Ia tom·bimonganiko sokachakna gita dingtang dingtang kamrangko ka·soengani gimin janapatengon, “Manderangko donchakna, salrurana, chel·chakanirangko on·na pilak kamrangkon sorkari nipilmanaha aro da·o ia G20 tom·bimonganiko Shillong-o chu·sokgipa ong·atna sorkari nisengenga,” ine Deputy Chief Minister parakataha.
G20 tom·bimongani somoirango ramarang apchangket ong·jana gitaba sorkari chanchimanaha aro VVIP-rangni re·ruraanirango kamrangko name nirokchina gita Traffic department-na ge·etaniko on·manaha ine Tynsong parakataha.
