SHILLONG: Meghalaya Reservation Policy-ni roster system-ko mikkangchinasa nie tarina gita a·dok sorkari, changgnimangde Meghalaya High Court-o bi·ahachim indiba reservation policy-ko ra·gatchengaonin roster system-ko tarichina High Court ge·etaniko on·aha ine Budbar salo, a·dokni Deputy Chief Minister Prestone Tynsong, talataniko on·angaha.
Roster system-ko ra·gatna gita a·dok sorkari, tik ka·manaha ine talataniko on·angengon, “2022 bilsion Meghalaya High Court, reservation policy-ko ra·gatchengaonin nangate roster system-ko tarichina ge·etaha aro chinga changgittammangde, roster system-ko batanggimin somoirangko nie ong·gija mikkangchinasa nie tarina on·china High Court-ko mol·molahachim. Indake ong·genchimoba reservation policy-ko ra·gatchengaonin nangchakate roster system-ko tarina High Court ge·etaniko on·aha,” ine Tynsong parakataha.
A·dokni chief minister Shillong-ona sokbapilahaon Cabinet-ni gita chanchirimani ja·man, MDA-o bakrimenggipa dolrang aro ja·mano pilak political dolrang baksa tom·e roster system-ko tariani bidingo chanchirimanggen ineba Deputy Chief Minister parakataha.
Roster system-ni bidingo pilak dolrang baksa agangrikani chu·sokjagenchimode aro Assembly-ni special session-ko ong·atjagenchimode ramarangona re·ange jingjengatgen aro manderangona re·ange iani bidingo agangrikgen ine Voice of the People’s Party (VPP) mikrakataniko on·angahachim.
“Sorkari baksa agangrikanichi iako chu·sokatna man·genchimode anga agan-chanchirimanio maming ong·gijakode nikja. Indiba jinma chanchirimani ja·manoba chu·sokjagenchimode aro Assembly-o sorkari, special session-koba ong·atjagenchimode chinga manderangona re·angana agre maming gipin cholrang dongjawa,” ine VPP-ni ku·wattimgipa Batskhem Myrboh parakataha.
Roster system-ni bidingo sorkarini gita aro dingtang dingtang dolrang baksa chanchirimna ku·rachakaniko on·atahaoba Assembly-ni special session-ko ong·atna gitade Deputy Chief Minister jechakatskaahachim ine nikna man·a.
