SHILLONG: Ru·uta bilsirangna Tura parliamentary seat-ko jakkepkame dongani ja·mano, NPP da·ode Shillong parliamentary seat-naba mikitching niatenga aro Congress dilgipa Vincent H Pala-ni sasononiko salseke ra·na gita tarienga.
Party-ni chanchianiko paraksrange aganengon, ‘‘re·baenggipa 2024-o Shillong NPP-ni gitalgipa MP-ko nikgen’’ ine NPP dilgipa aro Cabinet Minister Rakkam A Sangma Bristibaro aganaha.
“Anga namemanchan ka·donga aro Shillongni manderango bebera·a je, chinga gitalgipa MP-ko man·gen,” ua agandapaha.
Shillong seat-ko NPP chegen ine nang·ko maiomancha ka·dongata ine sing·anina aganchakengon, “NPP dolsa national party ong·a aro ia sorkari batanggimin term ba somoio kamrangko namen ka·aha aro da·oba MLA-rang bang·en donga, jemangan da·o kam ka·enga, iarangan mongsonggipa mesokani ong·enga,” Sangma aganaha.
NPP-ara, Salgro Salaram a·dokko, A·songni dingtang dingtang bakrang aro Delhi baksa nangrimatgipa party ong·a ine aganengon, “NPP dolsa national aro tribal centric tribalrangni gimin kam ka·gipa party ong·a aro ian salgro salaramni manderangna ia party-ko basena nambatgipa ong·enga,” Rakkam Sangma aganaha.
“Anga ka·donga, manderang da·alo kusi ong·enga aro chinga gital MP-ko man·gen,” ua agandapaha.
