SHILLONG: Roster system-ni minggittam point-rangko janapenba Bristibar salo, Hynniewtrep Youth Council (HYC), a·dokni Chief Secretary DP Wahlang-na sedoataha.
“Roster system-ko batanggimin somoirango nangchakate ong·gija mikkangchini giminsa tarichina chinga sorkariko nangnikenga,” ine HYC-ni president Robert Kharjahrin parakataha.
Gnigipa aro gittamgipa point-rangni gimin janapatskaengon, gnigipao je kamrangnan dongimin somoirang bon·ahachim, niamo pangchake ua kamrangna somoirangko on·pilna nangani dongjaha aro gittamgipao reservation policy-o dongimin gitan Khasi-Jaintia-rangna maming dingtangatani gri bak rengsiko on·angkuchina uamang nangnikenga ine HYC-ni president parakataha.
Kharjahrin-ni parakatani gitade, roster system-ko badia bilsioni nangchakate taria uade a·dok sorkarini jakosa ong·aia ine High Court raiko on·manahani gimin cut-off date-ko uamang, 2022 bilsini May ja dipet nangchakateaniko nangnikenga.
“A·dok sorkari, Assembly-ni gitama, pilak political dolrang baksa chanchirimema ma Cabinet gita tik ka·a uade sorkarini jakosa indiba roster system-ko tarion 2022 bilsionisa ong·na nanga,” ine Kharjahrin aganaha.
Job Reservation policy-ni gimin janapatskaengon, ia policy ba niamko batanggimin bilsi 50-na ja·rikbaengahani gimin niamo maming dingtangani dongna gita nangjawa ine HYC-ni president parakataha.
Social media-rango Khasi-Jaintia aro Garorangni gisepo ma·sisretgrikanirang ong·kattokenga ine janapatengon, ia jatgittamni gisepo maming ma·sisretgrikanirang dongjana gita sorkari, ta·raken ja·kuko de·na nangchongmota ine Kharjahrin didiataha.