SHILLONG: Job reservation policy-ni roster system-ko ra·gatani bidingo manderang baksa chanchirimna aro jinmana agan-talate on·na gita Voice of the People’s Party (VPP), dingtang dingtang biaprango jinma tom·bimonganirangko ong·atna sienga.
VPP-ni ku·wattimgipa Batskhem Myrboh-ni parakatani gitade, skanggipa tom·bimonganiko uamang April-ni 17 tarik attamni 2:00 baji dipet Mawlai-o donggipa Madan Heh-o ong·atanggen, uni ja·man April-ni 19 tarik salni 12:00 bajio Jowai-ni Iawmusiang-o aro gittamgipa tom·bimonganiko April-ni 20 tarik attamni 2:00 bajio Jaiaw-o ong·atanggen.
Roster system-ni bidingo chanchirimna gita Assembly-ni special session-ko ong·atchina dabianiko sorkari knachakjaengani gimin VPP, manderang baksa apsan chanchirimna ia tom·bimonganirangko ong·atna draatako man·aha ineba Myrboh parakataha.
“Reservation policy-ni roster system-ara chadamberangna aro mongsongbate Khasi-Jaintia jatni chadamberangna mongsonggipa bak ong·engachim indiba sorkari, iandakgipa kamrangni bidingo name chanchirimna sikgijaniko mesokaniara chadamberangna simsakgijaniko mesokani gita ong·enga,” ine VPP-ni ku·wattimgipa aganaha.
Special session-ko ong·atchina dabianiko sorkarini knachakjaenganiara niamo pangchake songgipa Meghalaya Legislative Assembly-ko mande ra·gija mesokani gitaba ong·enga ine Myrboh parakataha.
Ia tom·bimonganirangko ong·atanio re·bae bakko ra·echina gitaba ua, jolo songdongenggipa manderangko didiataha.