Shillong songjinmani chiring chibisikrangko tangatpiltaina tom·e chanchirima

SHILLONG: Shillong songjinmao donggipa chiring chibisikrang aro mongsongbate Wahumkhrah, Wah Umshyrpi aro Wah Umkhen chiringrangko tangatpiltaina aro gital dake ong·atpiltaina gita dingtangmancha tom·aniko Sukrobar salo, Yojana Bhawan-o ong·atangaha aro ia tom·anio a·dokni Chief Minister Conrad K Sangma, Deputy Chief Minister Sniawbhalang Dhar, Minister AL Hek, a·dokni Chief Secretary DP Wahlang, dal·dalgipa officer-rang, Dorbar Shnong-ni membor-rang aro dingtang dingtang dolni membor-rangba bakko ra·angtokaha.
Ia tom·anio a·dokni Chief Minister, jinmana aganprakengon, Shillong songjinmani mongsonggipa chiring chibisikrangko tangatpiltaina cholrangko sandina gita ia tom·aniko ong·ataha ine parakatenba, ia chiring chibisikrangko tangatpiltaina gita an·tangtangni ku·pattianirangko on·china Dorbar Shnong-rangko aro dingtang dingtang gittimrango songdongenggipa manderangko didiangaha.
A·dokni namgnina kamrangko ka·anio, samtangtango ong·telaigiparangnaba simsakna nangani gimin aganangengon, “A·doko namroro silroroanina kamrangko ka·engon, samtangtango ong·telaigiparangko chel·chakna aro ripingna sorkarini miksonganirangko apalbatatna gita ia tom·aniko ong·ataha,” ine Chief Minister parakataha.
A·doko donggipa chiring chibisikrangko tangatpiltaina aro gital ong·atpiltaina gita sorkari on·kange kamko ka·enga ineba ua aganaha.
A·gilsakni ding·batroroenganiko champengna, jabol galanirangko nirokna, plastic jakkalaniko champengna, bijolini garirangko jakkalanichi balwani mitchianiko champengna, manderangna mikrakatanirangko on·anichi aro chatro chatrirangni bak ra·anichi bol wa·arangko ge·na aro uandakgipa sorkarini dingtang dingtang kamrangni giminba ia tom·anio Chief Minister, agan-talate on·angaha.
Iana skang, a·dokni Chief Secretary DP Wahlang-ba jinmana aganprakangengon, chiring chibisikrangko moila ong·atjana gita NGT aro kacharini dongimin niamrang donga ine parakataha.
Wahlang-ni parakatani gitade, NGT-ni see rakkianio Wahumkhrah aro Umshyrpi chiringrangba a·songo mitchibatsranggipa dil 45 chirangoni damgni ong·enga. Manderangna mikrakatanirangko on·anio dingtang dingtang gittimni manderangko aro dingtang dingtang dolrang, jekai KHADC, Dorbar Shnong aro NGO-rangni bakrimanikoba ua didiataha.