TURA: Sukrobar salo, Garo Hills Autonomous District Council (GHADC)-ni bilsi 71 gapaniko ‘Council Day’ ine bimingko donenba Tura-ni District Auditorium-o maniangaha aro ia salko manianio a·dokni Education Minister aro Rongara-Siju-ni MLA Rakkam A Sangma, mongsonggipa sokgipa ong·e bakko ra·angaha.
GHADC-ni chang 71-gipa Council Day-ko manianio dongpae bakko ra·anggipa gipin manderangara, West Garo Hills a·jani Deputy Commissioner Jagdish Chelani, GHADC-ni chief executive membor (CEM) Albinush R Marak, deputy CEM Nikman Ch Marak, gipin executive membor-rang, MDC-rang, GHADC-o kam ka·enggiparang aro dingtang dingtang skulni chatro chatrirang ong·a.
Ia tom·aniko ong·atanio a·dokni Education Minister, jinmana aganprakangengon, A·chik jatni daka rikanirangko aro gam-jinrangko chel·chakna gitasa Sixth Schedule-ni ning·o GHADC-ko on·aha ine parakatenba, district council-ni gamchatani aro iako ripingna nangani gimin jinmana agan-talate on·angaha.
GHADC-ko nambatatna gita GHADC-o kam ka·enggiparangko aro Garo Hills-o songdongenggipa manderangko didiangengon, GHADC-ni pilak kamrangon a·dok sorkariba pilak nanga dakchakanirangko on·enga ine Sangma parakataha.
Ia Council Day-ko manianio A·chik band-rangoni mingsinggipa ‘Da Suraka’ dolba gitrangko ring·e manderangko an·saotangaha aro unbaksana Stephen Memorial, Montfort School, Christian Girls Higher Secondary School aro Tura Public School-ni chatro chatrirangba gitrangko aro dakmesokanirangko mesokangaha.
Ia manianio Do·kaku Arts & Culture Association-ni gita Wangale mesokangskaaha.
