SHILLONG: People’s Democratic Front (PDF)-ni MLA sakgni, National People’s Party (NPP)-o napskana miksongenga ine jangbingbanganiko NPP-ni national vice president aro Meghalaya a·dokni Deputy Chief Minister Prestone Tynsong jegalataha.
Tynsong-ni parakatani gitade, PDF-ni MLA-rang NPP-o napna miksongenga ine agananiko ua an·tangde knaa dongkujachim.
“Angade iani bidingo maming kobor dongkuja. Je manderangan iako na·simangna aganaha, uamangonikon tale sing·e ra·ebo,” ine Tynsong, kobor ra·timgiparangna aganaha.
MLA sakgni, NPP baksa bakrimna agangrikenga ine agananiko PDF-ni dilgiparangba adita salrangna skangsan ku·chaktokahachim ine nikna man·a.
Da·o dipet Assembly-o PDF-ni MLA sakgni donga aro uamangara Banteidor Lyngdoh baksana PDF-ni president aro Sohra-ni MLA Gavin M Mylliem ong·engachim ine nikna man·a.
PDF-ni president aro MLA Gavin M Mylliem-ni parakatani gitade, PDF-ni MLA sakgniko bakrimchina gita NPP-ni dilgiparangan didiahachim.
NPP-o da·o dipet sak 26 MLA-rang dongenga aro PDF-ni MLA sakgniba NPP-o napahaode sak 28 gapanggnokchim.
